من كثر ماهي طيّبة قلب وإحساس
ـــ تقول ياليت الوجع بي ولا فيك !
تقول : أحب الناس لجلك من الناس
ـــ لامن طروا شهم ٍ ذكرتك وأحاكيك
يكفيك يوم ٍ أمسك بيّدي الكاس
ـــ أشوف به وجهك وأصوّت وأناديك
لايابعد كل الحكي .. شفت هالراس ؟
ـــ لو تطلبه يفداك .. ياليت يرضيك !
___________
ياكبرها لاصار وقتك يعاديك !
ـــ حتى رماك بسهم ربعك وناسك
ياثقلها لا صار دمعك باأياديك
ـــ ويطيح بعضه وأمتلى منه كاسك !
أقلّها يوم ٍ ندهتك وأناديـك !
ـــ مديت لي طعنه وأنا أحبّ راسك !
____________
أحسّ النافذه
[ أنثى ]
تشيل بصدرها
[ أسما ]
__________
ماكِنت أضن الحكي
أعمى !
لو كان له حاجبٍ
يدمى !
ماكنت أضن البشر
تقوى
وإن صار لك كتف
كم يقوى ! ؟
ياشعري الأعظم !
الأجمل !
ياسيّدي
ـ يابعد حبري !
وشفيك ماتحسن
الأسما !
وشفيك من صفعه
لأخرى !
هيّا معي !
عطني إيديني !
هيا معي !
وإسكن بصدري !
كم قلت لك ! ؟
ـ طيعني تكفى !
ماطعتني !
ـ شف يدي تُدمى !
.
.
ماكنت أضن الحكي
أعمى !
لين إنجرح سطري
الأسمى !
.
.
يامايل الخد !
لاتجرح !
ياباهي الحسن
من تجرح ؟
في صدري النور والغيمه !
في جفني الناس ...
ترنيمه !
ياعينك اللي ترامت بي !
ياجرحك اللي
مشى دربي !
يكفي عليك الحكي
كلمه !
ماهو أنا من رمى صدره !
من عثرته
ولخطى رجله !
وإن شمت ... ماشمت بك
إلا !
إني مطر !
للقلوب الما !
.
.
هذا انا
وإنت لاتحكي !
ماكنت أضن
الحكي أعمى !
حتى ثمل ثغرك
باأشيا !
كنت أحسبه أعظم
وأسمى !
.
.
عطني يدي
وإترك الباقي !
لك منّي
أشكرك واتعذّر !
آسف
على الحب ...
وإيديني !
___________
أنا موجوع
ياسلمى
وأبي إيدٍ تواسيني
تعانق ماسقط مني
وتمسح وجنتي
بالما
وش اكثر حزن
ياسلمى ؟
وش أكثر همّ
ياسلمى ؟!
وانا ذاتي صفع
ذاتي !
وأنا ضيعتني
ليله !
مابين الحلم
وآهاتي !
وش أكثر همّ
ياسلمى !
وانا أنسج لك
حكايتي !
وتسقط
كل دمعاتي !
بلاش من العتب !
وأدمى !
بلاش من الشقا
وأدمى
بلاش من الضياع
وما !
يرد من الحكي
صمتي !
تعبت
أستغفر الضيقه !
لِك الله
كم تبسمتِك
وأنا
في داخلي أشيا !
وأنا
في داخلي منفى !
وانا
في داخلي ...
شـ احكي ؟
وربي
طاحت الدمعه !
وأنا شهم ٍ
قسى وقته !
____________
يالابة ٍ تحمل
كفوف السحابه
يارافعين الروس
عزٍ وهيبه
لو الفَخَر يتشكّل بوجه
لابـه
عز الله
إن الفخر
كِلّه [ عتيبه ]
إن قلت أبمدح
يايدين الكتابه !
هات القلم ياعزوتي
بنتخي به
ماهي غريبه
دامهم من [ شبابه ]
ربع ٍ يجونك في مواقف
عصيبه !
.
.
ربعي وربع المجد
والعزّ والهيل !
ربع الشرف والفخر
والنار والخيل !
لامن تعزويت العتيبي
تطمّن !
من بعد رب الناس
تبشر بعزّك !
عز الله إنه
لو نحر لك
عياله !
ماهزّ به رمش ٍ
إذا هي كرامه !
.
.
قد قلتها مليون مرّه
ومرّه !
وانا أحترم فيها
جميع القبايل
لو الفخر
يتشكّل بوجه لابه !
عز الله إن الفخر
كلّه !
[عتيبه ]
.
.
__________
هربنا من مشاكلنا وجيناك .. بقلوب أطفال
ـــ لقينا بـ ايدك الخنجر يبي يبتر برائتنا
تراها كفّت الدنيا هموم وضيقه .. وغربال
ـــ إذا حتى مشاعرنا بلحظة صمت .. خانتنا !
ترافقنا مع الدمعه وهي في ذلّنا .. تختال !
ـــ لقيطه ..عاهره .. سُفلى وبنت الطهر.. عرّتنا !
_______________________
سلمى !
بعيونها تولد
الغيمه
وبثغرها تنجب
البسمه !
هي مشتليّة حسن
وأكثر !
هي مخمليّة جفن
وأكثر !
في خدّها
صبح متفائل !
في جِيـدها
غصن يتمايل
عزفه
على هيكلة أنثى !
في كل خطوه
لحن صاخب !
في مشيها
تعزف الخطوه !
متموسقه
تلبس الأزرق !
مائيّة الحسن
نهريّه !
لامن حكت تنولد
موجه !
موجه من الصوت
محسوسه
في نطقها
ـ لفظها
نوته !
ترقص مع اللفظ
شفتّها !
.
.
لا جيت توصف
يرّد الشِعر !
ـــ ياسيّدي
كيف أبوصفها ؟
ذي ثورة شعور
مقروءه !
يعني إذا جيت
توصفها !
بسمل
وقل ياعظم ربيّ !
سبحانه الله
خالقها .
سلمى
وأنا لا نطقت
الما !
يشبه يديها ...
وضحكتها !
سلمى
وإذا قلت أنا
سلمى !
ماشفت أنثى
سوا
سلمى !
ليست هناك تعليقات:
إرسال تعليق